«Expo 2020 Dubai» халықаралық көрмесінде «Ақтөбе облысының күндері» өтті
10 наурыз, бейсенбі күні Дубай қаласында өткен «Expo 2020 Dubai» халықаралық көрмесінде «Ақтөбе облысының күндеріне» арналған іс-шара Қазақстан Республикасының Біріккен Араб Әмірліктеріндегі Елшілігінің және «KAZAKH INVEST» ҰК» АҚ қолдауымен өтті. Оған өңірдің бизнес субъектілерінің өкілдері қатысты. Делегацияны Ақтөбе облысының әкімі Оңдасын Оразалин басшылық етті.
Өткізілген шара аясында Ақтөбе облысының әлеуметтік-экономикалық және мәдени-туристік әлеуеті таныстырылып, өңірдің өнеркәсіптік және агроөнеркәсіптік секторындағы кәсіпорындарының өндірістік мүмкіндіктерінің, ет, ұн және макарон өнімдерінің, сонымен қатар, мұнай-газ және теміржол салаларына арналған резинкалы-техникалық бұйымдардың көрмесі ұйымдастырылды.
БАӘ мен Ақтөбе облысының бизнес өкілдері бизнес форумға қатысып, B2B және В2G алаңдары ұйымдастырылды, онда өзара тиімді ынтымақтастықты дамытудың келешегі бар бағыттары талқыланды.
Іс-шара нәтижесінде «Petromal», «Unique Group Hotels and Travel» және «Metito» шетелдік компанияларымен мұнай-газ, туризм салаларындағы, сумен жабдықтау және инвестиция тартудағы өзара тиімді ынтымақтастық туралы меморандумдарға қол қойылды.
